Vieiros

Segundo a APDR, non se trata de feitos illados, senón que se repiten con frecuencia dende hai tempo "sen que por parte da empresa nin das autoridades locais, autonómicas ou estatais se teñan adoptado as medidas necesarias para impedilos". A asociación advirte do perigo potencial que entrañan estes feitos. Existe risco de danos persoais ou ambientais severos, e non existe un "Plan de Emerxencia Exterior" que poida funcionar no caso dun accidente grave no complexo, o que aumenta o grado de indefensión da poboación. Isto debería abondar para paralizarse a actividade de ENCE-ELNOSA na súa actual localización, "que segue a ser ilegal, xa que incumpre as exixencias do RAMINP no que fai á distancia mínima exixida aos núcleos de poboación". A APDR esixe ao Concello que abra un expediente sancionador á empresa pola alarma social provocada e por incumprimento da lexislación en materia de ruídos. Tamén solicita coñecer os resultados das medicións do ruído realizadas pola Policía local na noite do 29 ao 30 de novembro, e que inste á Xunta de Galicia a aplicar o acordo programático de goberno no referente ao complexo e decrete o fin da actividade industrial de ENCE-ELNOSA en Lourizán en base ao incumprimento do RAMINP.