Vieiros

A seguinte da lista é a ex-muller de Ortega, Rosalía Mera Goyenechea, que se atopa no posto undécimo e é ademais a segunda muller coa maior fortuna de España, só por detrás de Esther Koplovitz. Os 2.297 millóns de Mera, cofundadora de Zara, inclúen o 6,99 por cento de Inditex, un 5% de Riofisa e outro tanto de Zeltia. Dela destácase a súa aposta polo labor social, a través da fundación Paideia Galiza, e a diversificación que fixo do investimento. No vixésimo posto está o betanceiro Xosé Manuel Loureda Martiñán, fundador e ex-presidente da construtora Sacyr, que comezou de xefe de obra e agora posúe o 13,44% de Sacyr Vallehermoso. A súa fortuna calcúlase en 1.737 millóns.

Na clasificación dos 50 máis ricos segundo as súas participacións, atópase nunha posición destacada Manuel Jove, na categoría de máis de 3.000 millóns. Do empresario coruñés, fundador de Fadesa, dise que é o multimillonario do estado máis desexado e con máis diñeiro dispoñíbel para investir, pois entre o seu patrimonio e a súa capacidade de endebedamento pode pasar dos 6.000 millóns de euros. A súa recente decisión de vender o 54% de Fadesa (2.200 millóns de euros) e o 5% de Unión Fenosa (600 millóns) convertérono no punto de mira doutras empresas que se atopan á procura de investidores. O informe salienta a importancia do sector da construción dentro da clasificación das meirandes fortunas de España.