Vieiros

Hai días nos que é mellor non saír da casa. Unha noite de copas con Pocholo e a desmesura nas palabras foi suficiente para poñer ao rexedor contra as cordas diante da opinión pública. Por se isto fora pouco, Campo ía acompañado na foliada ibicenca de dous traballadores municipais. Entre sopros de gaitas e de consumicións efervescentes as intervencións do alcalde van subindo de tono, á vez que fachendea diante dos presentes cun feixe de billetes. A oposición política de Ortigueira sinala que esta non é, nin moito menos, a única pega da carreira política do rexedor e empresario. Dende o BNG denunciaron publicamente presuntas persecucións laborais a determinados funcionarios ou operacións urbanísticas de dubidosa legalidade.

Antonio Campos goberna Ortigueira dende 1999. Nos últimos comicios muncipais, logrou nove dos trece concelleiros encabezando a lista do Partido Popular. Pertence a unha familia de acaudalados empresarios, entre os que destaca Epifanio Campo, coñecido empresario de Bergantiños, que xa na década dos sesenta descubriu que debaixo do val das Encrobas se agochaba lignito. Antonio Campo foi e é, segundo fontes conservadoras, un dos principais adalides de Xosé Cuíña na provincia coruñesa. O seu carácter extrovertido ten posto en máis dun apreto público a conselleiros da Xunta anterior.