Vieiros

O hiperactivo Bocixa debuta como director e guioniza este proxecto que lle toca ben de preto, sobre a expropiación dunha parroquia da súa Cerceda natal. Na dirección fotográfica está o fisterrán Benjamín Trillo, na realización e edición Mon Soares, a cargo do son Roi Gil, e na produción Roi Carballido, Paco Ramos e Emi Candal. Trátase dunha coprodución de Videa Film e Ignacio Benedeti Cinema, que produciu El regalo de Silvia, Minotauromaquia, La casa de mi abuela e Lobos acosados.

A ceo aberto leva xestándose dende outubro do ano pasado. O documental aborda As Encrobas dende o momento en que se considera a extracción do carbón (1974), un confllito que deu a volta ao mundo nos últimos estertores do franquismo, que favoreceu a expropiación de terras para que Unión Fenosa se encargara da explotación da mina. O acordo chegou cunha manifestación na Coruña na que os labregos contaron cun grande apoio politico, social, sindical, estudiantil, cultural etc

"Aquel acordo só foi respetado en parte e no documento que se está rematando de gravar analízase a evolución da mina, como foi devorando un val que tiveron que abandonar paulatinamente preto de mil persoas", contan dende a produción: "O Concello de Cerceda pegou un xiro na súa base económica e a agricultura e gandeiría foi esmorecendo a costa da minería. Actualmente a mina de carbón esgota as súas reservas, a Central Térmica ten que adaptarse a outras enerxias e Cerceda enfocou o seu futuro cara á gran industria que actualmente hoxe representa Sogama, industria contaminante que os responsábeis pretenden combinar con ocio e turismo."