Vieiros

O club de remo Samertolameu celebrou esta fin de semana o seu patrón co triunfo final na Liga Noroeste de Traíñas. Logo de ter dominado con moita superioridade a proba desde o seu comezo o pasado 10 de xuño, os de Moaña acadaron esta fin de semana o primeiro posto na XVI Bandeira de Oleiros e o segundo posto na de Ferrol. O Amegrove, que rematou cuarto en Oleiros, obtivo finalmente o segundo posto da xeral, seguido no podio polo club Perillo. Os gañadores recolleron a bandeira que os acredita como campións da liga de mans de Milagros Lantes, delegada provincial da Consellaría de Deportes. Deste xeito, a Liga Noroeste, despídese das augas galegas ata o próximo verán.