Vieiros

"Asumo o rol de favorito porque, sobre todo, ese era o meu obxectivo do ano: liderar ao equipo na Vuelta". Deste xeito Óscar Pereiro recoñece que agora todas as miradas están centradas nel. O de Mos comparte protagonismo nesta edición con Menchov, Valverde, Sastre e Vinokurov, aínda que el tamén inclúe nesta lista a Mayo e Zubeldia.

Pereiro compartirá o liderado do Illes Balears co seu amigo Alejandro Valverde aínda que matiza que "a carreira será quen diga quen é o líder do equipo". Malia isto, o galego asegura que "se o un necesita ao outro" dependendo de como de desenvolva a carreira ambos o farán "sen problema algún".

Unha edición innovadora
Esta edición da Vuelta prescindiu de portos míticos como o de Covadonga ou o Angliru. Porén, destaca no trazado a dureza das primeiras xornadas cunha chegada en alto xa na quinta tirada. Pereiro sinala que "houbese preferido unha carreira tipo Tour, deixando o máis duro para o final", co fin de gardar máis tempo a interrogante de quen podo gañar a carreira.

A Vuelta comeza este sábado en Málaga cunha contrarreloxo por equipos e rematará o vindeiro sábado 16 de setembro en Madrid. Logo de máis dunha década sen pasar por Galiza, o pelotón regresa as nosas terras. Será en concreto na oitava tirada que situará a liña de meta en Lugo, despois de pasar por localidades como O Barco de Valdeorras, Quiroga ou Monforte de Lemos.