Vieiros

Se descontamos as emisións das centrais térmicas galegas, as mencionadas máis a de fuel de Sabón, as nosas emisións por habitante serían "só" de 10,1 toneladas, é dicir, practicamente iguais ás do conxunto de España. E é que non hai ningún estado europeo que teña unhas emisións por habitante debidas á xeración de electricidade con carbón tan altas como as do noso país. Séguenos a República Checa, mais a grande distancia.

Segundo os datos divulgados polo Ministerio de Medio Ambiente, as instalacións industriais galegas integradas no comercio de emisións de dióxido de carbono (CO2) -o principal gas de efecto invernadoiro- emitiron 17,3 millóns de toneladas de CO2 no ano pasado, sendo responsábeis do 41,2 por cento das emisións galegas. O resto das emisións correspóndelles a outras industrias e aos sectores chamados difusos, entre os que o transporte ten un peso moi destacado e cada vez maior.

Todos os sectores emitiron menos CO2 que o que lles foi asignado gratuitamente no Plano Nacional de Asignación de Dereitos de Emisión (PNA) 2005-2007. Todos, agás o sector eléctrico. As centrais térmicas de carbón (As Pontes, Meirama) e de fuel (Sabón) emitiron 14 millóns de toneladas de CO2 , é dicir, un 28 por cento máis que a cantidade que lles foi asignada gratuitamente para o 2005, cantidade que é superior á que lles foi asignada para este ano, á súa vez maior que a correspondente ao 2007.

O maior foco emisor de CO2

A central de ENDESA nas Pontes volveu ser en 2005 o maior foco emisor de CO2 de España e un dos maiores de Europa. E iso sen contar as importantes emisións xeradas, dentro e fóra do noso país, polo transporte dos millóns de toneladas de carbón que ENDESA importa para alimentar a súa central térmica galega. Após o esgotamento da mina de lignito, a partir de 2008, a central das Pontes queimará só carbón de importación, polo que as emisións asociadas ao transporte do carbón serán aínda maiores do que o son hoxe.

As emisións de CO2 das Pontes son de tal magnitude que resultan mesmo superiores ou similares ás de pequenos estados europeos, como Lituania ou Chipre. Isto é así porque se trata dunha central de grande tamaño, da central termoeléctrica española con maior potencia, e porque usa o combustíbel máis nocivo para o clima. Polo seu maior contido en carbono, o carbón é o combustíbel que máis CO2 emite en relación coa electricidade que xera, sobre todo se o comparamos co gas natural. Producir moita electricidade con carbón é un negocio moi malo para o clima. ENDESA leva lanzando desde 1975 unha enorme "OPA hostil" contra o clima desde a súa central das Pontes. Unha OPA pola que só comezou a pagar no ano pasado, ao entrar en vigor o réxime de comercio de emisións, e despois de obter, a xuízo das organizacións ecoloxistas, unha xenerosa asignación de dereitos gratuítos de emisión para a primeira fase de aplicación do comercio de emisións.

Pouco pode facer a central das Pontes para deixar de ser unha industria tan inimiga do clima. A reforma da central que se está a facer para que poida queimar só carbón de importación, suporá, segundo a propia ENDESA, unha redución das emisións dun 10 por cento, debida á mellora do rendemento da central. Non é pouco en termos absolutos, mais o Kwh da central seguirá sendo moi intensivo en carbono. Moito máis do que nos podemos permitir a comezos do século XXI, cando sabemos que é moi pouco responsábel non tomar en serio o problema do cambio climático e non actuar para o atenuar e retardar.

O artigo completo, na edición impresa de TEMPOS (nº 110, xullo 2006)