Vieiros

Eva Castro acadou esta fin de semana a medalla de bronce no campionato de Europa de ciclismo de montaña na modalidade de descenso a catro (catro corredoras baixan á vez por un circuíto de descenso, corto e con saltos e peraltes, similar a un de BMX).

A ciclista de Oleiros realizou o terceiro mellor tempo nas probas clasificatorias, o que lle permitiu elixir carril para realizar o descenso. Logo de gañar dúas mangas, na proba final Castro loitou por manter a terceira posición duramente na primeira recta, nun trazado longo e moi técnico. Unha vez asegurado o bronce, a corredora galega valorou a posibilidade de adiantar a austríaca Anita Molcik e, aínda que tivo a oportunidade nun par de curvas, preferiu non arriscar e manter o terceiro posto.

Este é o resultado máis importante do ciclismo feminino galego en toda a historia. O ouro foi finalmente para a neerlandesa Anneke Beerten (resultados completos).

A ciclista do SCR de Oleiros asegurou estar moi contenta pola medalla conseguida xa que é o seu primeiro título internacional, e xa que se converte na primeira ciclista española, tanto en categoría masculina como en feminina, en acadar un metal na modalidade de descenso a catro. "Espero que esta medalla sirva para chamar un pouco a atención sobre o fourcross" comenta Castro que tivo que participar por libre neste europeo ante a falta de apoio da federación española.

Co bronce na man, Castro non quixo esquecer as persoas e institucións que lle brindaron o seu apoio e que fixeron posíbel a medalla: "quedaríamos sen tempo se comezase a citar os meus patrocinadores" asegura. A ciclista agradeceu efusivamente os parabéns recibidos vía sms por parte de familiares e amigos, así coma o labor desenvolvido polo concelleiro de deportes de Oleiros, Antón Tenreiro. O director xeral para o Deporte, Santi Domínguez tamén felicitou a Eva pola súa actuación en Alemaña.

Aínda así, o metal de Castro ten unha dedicatoria especial para a súa amiga chilena e tamén corredora Bernadita Pizarro que sufriu un grave accidente a semana pasada. "Espero que se recupere canto antes e que non sexa tan grave como teño entendido".

Participación no mundial
Eva Castro está xa a pensar na última proba da Copa do Mundo que se celebrará en Austria en setembro. Aínda así, a ciclista non perde a esperanza de que esta semana reciba a chamada do seleccionador estatal para participar no mundial que se celebra a finais de agosto en Nova Celandia. "É complicado porque a federación conta cun orzamento moi limitado para a súa participación no mundial. De todos os xeitos e aínda que é moi improbábel, non descarto que o bronce obtido esta fin de semana sirva para que na federación aposten por min" asegura Castro.