Vieiros

Xa se pode consultar na web do Festigal boa parte da programación confirmada. Na parte musical, a noite do 24 actuarán The Homens e Ruxe-Ruxe pola parte galega, 08001 dende Barcelona, Manimal dende a Ilha de Vitória (Espírito Santo - Brasil), e DJ Floro, dende Madrid. O 25 será a quenda de Espido, Kepa Junquera e Mercado Negro, o último proxecto do cantante de Kussondulola (Portugal). Na páxina do festival pódense escoitar anacos da música destes artistas, a través da Radio Festigal.

Na Galería de Ideas a día de hoxe hai programados catro debates, cos títulos Un novo estatuto para a nación galega, Un ano de goberno na Xunta, Que se move en Latinoamérica? e Recuperarmos a memoria Histórica. A Galería das Letras estará unha ano máis inzada de actos literarios e presentacións, nas que destacan a da última novela de Manuel Rivas, Os libros arden mal, que estará nas tendas nos vindeiros días, e a de Suso de Toro, Home sen nome. Na Galería Audiovisual destaca a proxección de O alquimista, documental de IB Cinema sobre as relacións entre o réxime franquista e o naci alemán, e das microcurtas da Escola de Imaxe e Son da Coruña.

O programa complétase cos espazos de animación e de artesanía e asociacións, que mostrarán o seu traballo durante os dous días que dura o festival. Tamén se fará un acto de presentación da Asociación Punto Gal, apoiada polo Festigal, que este ano quixo engadirlle un matiz reivindicativo ao seu nome, poñendo no cartel o título de Festi.Gal.