Vieiros

Chus Lago, que partira o pasado 2 de maio cara Grenlandia co obxectivo de atravesar os case 700 quilómetros da illa de oeste a leste, viuse obrigada a abandonar a expedición debido ao mal estado dos materias cos que contaba. Lago e o seu compañeiro, Xoán Martínez foron localizados onte por unha avioneta e trasladados en helicóptero a Kangerlussuaq. Desde o pasado 9 de maio Lago encontrábase sen comunicación telefónica debido a uns problemas cos paneis solares, porén, a galega decidiu continuar xa que o teléfono non se considera algo fundamental para completar a expedición. Foi finalmente un fallo na batería da radiobaliza o que obrigou a galega a emitir unha mensaxe de rescate xa que, de esgotarse a enerxía a expedición non podería ser localizada de ningún xeito. A sinal, que debía repetirse durante unhas 48 horas só se emitiu unha hora e media, o que provocou que os equipos de rescate tardasen case tres días en localizar os expedicionarios.

Lago xa anunciou que lles esixirá responsabilidades os dispensadores do material para a expedición xa que, non só foi o fallo da radiobaliza e dos paneis, se non que o resto do material de arrastre tamén presentaba defectos e tivo que ser amañado numerosas veces durante o percorrido.