Vieiros

En cifras totais Galiza quedaba á fin do mes de febreiro en 178.373 parados, un 1.67% menos ca no mes de xaneiro, aínda que a evolución é mellor se comparamos os números cos de hai un ano polas mesmas datas, rexistrando 8.113 desempregados menos, unha redución na taxa interanual de desemprego do 4.35%. Nese treito só outras dúas comunidades autónomas rexistraron unha evolución mellor no recurte do desemprego, Cantabria, onde o paro minguou un 8.42% e Asturias, onde a redución foi dun 7.26%.

Por provincias, a mellor evolución no último mes foi na provincia de Lugo, cun 3.44% de parados menos, aínda que ao longo dos doce meses anteriores foi A Coruña a provincia onde máis caeu o paro, 4.339 persoas menos, un 5.74% de redución. O número de extranxeiros rexistrados nas oficinas galegas do INEM chega ás 5.644 persoas, 3.749 chegadas de países de fóra da Unión Europea e 1.896 da UE, e apenas unha ducia menos ca no mes anterior. No conxunto do Estado o paro queda nun total de 2.169.277 persoas sen traballo, apenas un 0.10% menos no último mes e un 0.18% máis ca na mesma altura hai doce meses.

Desde UXT-Galiza alertaban este xoves do baixo número de contratos indefinidos asinados durante este último mes de febreiro, só o 11.2% do total, mentres que o 88.79% restante eran de carácter temporal. "Isto evidencia que a temporalidade segue a ser unha constante do mercado laboral galego, o que dificulta a estabilidade para moitos traballadores, unha proxección de futuro e unha perspectiva vital a longo prazo", critican desde o sindicato. Á beira, un 74% do total da contratación foi por obra ou servizo eventual, indicador que na opinión de UXT dá conta da precariedade do emprego que se está xerando en Galiza.