Vieiros

"Reforzar as incompatibilidades dos altos cargos e promover unha lei de transparencia que contemple, entre outros aspectos, a regulación dun código de conduta dos empregados e cargos públicos". Así o recollía o documento consensuado por socialistas e nacionalistas o pasado verán, prometendo de xeito específico que se facilitaría a accesibilidade a través de internet e en tempo real "ás actuacións das institucións galegas, incluídas as estatísticas e os estudos demoscópicos oficiais" no contexto da "revitalización da vida democrática en Galiza, co fin de incrementar a eficacia e a transparencia no funcionamento dos poderes públicos".

Deste xeito a lei da que agora se aproba o anteproxecto incluirá a creación dun rexistro de "actividades e bens patrimoniais dos membros do Goberno", incluíndo os salarios de todos os membros do goberno autonómico e dos altos cargos da administración, que serán publicados e accesíbeis a todos os cidadáns través da web da Xunta. "É unha lei importante coa que se quere cumprir un compromiso que asegurei que se realizaría no primeiro período de sesións parlamentarias deste ano", gabou o presidente. Emilio Pérez Touriño destacou ademais que esta sexa a primeira lei impulsada polo bipartito.

No contexto da promesa de "eliminar o clientelismo e a manipulación informativa e respectar as iniciativas sociais desde o executivo destacan tamén que esta norma esixe a publicidade dos "criterios e baremos que rexan cada concurso para contratos públicos, cesións de contrato e subcontratacións" da Xunta de Galiza.