Vieiros

Os fondos de axuda a minería en crise foron un factor decisivo na veciña comarca do Bierzo para favorecer a reestruturación do seu tecido empresarial. O abaratamento do chan industrial, ata tres veces máis barato que no Barco, como consecuencia das subvención ten atraído a numerosas empresas e constitúe un atranco para o desenvolvemento e a diversificación económica da bisbarra valdeorresa. As empresas ao avaliar os custes de instalación decántanse polo Bierzo como opción máis barata e mellor comunicada para a saída dos seus produtos.

Por outra parte o Ministerio de Fomento ven de anunciar a elaboración do estudo previo para o enlace da conca louseira de Carballeda coa N-120, co que se pretende evitar que o tránsito de camións atravese o casco urbano do Barco. Sobre este particular existen diferentes alternativas. O alcalde do Barco defende a variante por Coedo e Viloira ata o polígono da Raña, mentres que a de Carballeda e o de Rubiá prefiren a saída de Sobradelo polo val do río Galir ata A Veiga de Cascallá. Segundo parece os técnicos van a estudar todas as opcións e propoñer a máis viable.