Vieiros

Foron 3,7 millóns de votos para a Concertación Democrática liderada por Bachelet fronte a 3,2 millóns recibidos pola candidatura coa que o multimillonario Sebastián Piñera ía á fronte de Renovación Nacional, que resolveron a elección cunha vantaxe de sete puntos a prol da candidata socialista. "Semellaba complicado, pero foi posíbel porque os cidadáns quixérono así e a democracia permitiuno: gracias pola confianza", declarou Bachelet nada máis confirmar a súa vitoria. "A miña vida non foi doada", lembrou a filla de Alberto Bachelet, quen fora membro do goberno Allende e asasinado pouco despois do golpe de Estado de 1973. A propia Michelle Bachelet, estudante de Medicina afiliada ás Xuventudes Socialistas daquela, fora enviada a un campo de concentración con súa nai e torturada, tendo que marchar despois ao exilio. "A violencia estragou o que amaba", recordou, "fun vítima do odio pero consagrei a miña vida a darlle a volta e convertilo en amor e tolerancia".

A herdanza de Lagos
O ascenso de Bachelet produciuse con Ricardo Lagos na presidencia, onde lle tocou asumir as carteiras de Saúde e de Defensa. Lagos deixará en marzo a presidencia cunha elevada popularidade avalada polas sondaxes. Os datos do crecemento económico de 2005 amosan unha suba de até o 6% nese indicador, e a taxa de desemprego queda no 7,5%, coa inflación moderadamente controlada. As gabanzas a Lagos inclúen tamén o éxito na reforma da Constitución que eliminou os últimos vestixios da ditadura, as transformacións a nivel do exército e o inicio do proceso para a lembranza e reparación dos danos ás vítimas do rexime do ditador Pinochet. "Son optimista, recibi un país en marcha", declarou Bachelet.