Vieiros

O aumento na participación, tanto no número de traballos, como na diversidade de países participantes (47) pón de manifesto a consolidación, crecemento e proxección internacional do Festival de Cine Independente de Ourense.

Xa se recibiron un total de 603 traballos, fronte aos 544 da edición desenvolvida en 2004. Esta cifra ainda aumentará dado que o capítulo de traballos para a preselección se completará cunha selección de títulos visionados noutros festivais e outros eventos cinematográficos, polo que a cifra real de películas da que sairá a selección definitiva será superior ás 603 xa recibidas.

Entre as diferentes seccións oficiais aumenta o número de traballos presentados para a competición de curtametraxes (352 fronte os 337 da pasada edición), e notablemente o de documentais (178 fronte ós 134 de 2004). En canto ás longametraxes, recibíronse 73, mesmo número que en 2004, ainda que a estes se engadirán os traballos antes citados que foron visionados noutros festivais.

Países participantes

E canto á participación, encontramos traballos dun total de 47 países (17 máis que en 2004) dos 5 continentes. Os países con maior número de traballos presentados son España, Alemaña, Francia, México, Estados Unidos e Reino Unido.

A relación de cinematografías que optan a participar no Festival de Ourense complétase con países como Portugal, Italia, Corea, China, Xapón, Noruega, Ucrania, Rusia, Letonia, Nova Zelanda, Australia, Irán, Marrocos, Arxentina, Uruguai, Brasil, Suecia, Burkina Fasso, Polonia, Bulgaria, Hungría, Canadá, Bélxica, Chile, Irlanda, Lituania, República Checa, Islandia, Estonia, Escocia, Cuba, Bolivia, India, Holanda, Suiza, Croacia,
Luxemburgo, Austria, Finlandia, Perú e Colombia.

A selección oficial, que se está a realizar durante o presente mes de setembro, deixará en 80 (10 longametraxes, 10 documentais e 60 curtas), o número definitivo de traballos que optaran ós premios do X Festival Internacional de Cine Independente, que se desenvolverá do día 12 ao 19 de
novembro en Ourense.