Vieiros

Os mozos do Festiclown continuarán nas terras de Chiapas o labor de formación en técnicas teatrais, á beira das propias actividades de animación entre os cativos da zona, pero desta volta coa vontade de "deixar semente de futuro". É nesa liña que se pretende a creación dunha escola que fomente o teatro coma "instrumento de expresión da cultura dos pobos indíxenas e a creación de obras impulsadas por promotores locais". Ademais, a medio prazo unha meta máis ambiciosa: "dar lugar algún día á que sería a primeira compañía de pallasos indíxenas".

Será a terceira ocasión na que o Festiclown cruze o Atlántico cara a Chiapas, desta volta integrada polos clowns Iván Prado, director do Festival Internacional de Clown de Galiza e da propia compañía Os Sete Magníficos Máis Un; Manuel Vicente; o malabarista David Bruzos; a zancuda Sandra Caracoles; o contacontos e mestre de cerimonias Gerardo Santjosep; o poeta e xornalista Antón Lopo e Xavier Pin, loxista da xira.