Vieiros

O ex-xeneral, ex-golpista e ex-presidente da Guiné Bissau, João Bernardo 'Nino' Vieira venceu na segunda volta das presidenciais guineanas, cunha marxe de só 15.000 votos. O seu adversario, o primeiro ministro Malam Bacai Sanhá, que vencera na primeira volta e que estaba apoiado polo principal partido político guineense (PAIGC), amosou a súa discrepancia cos resultados e acusou a Comisión Electoral de pechar os ollos ante as ilegalidades, especialmente o uso de listas manuscritas de electores non inscritos nos cadernos. A situación no país é polo momento tensa, logo da tentativa de asalto do pazo onde se reúne a Comisión Electoral, e mesmo se especulou con adiar o anuncio dos resultados. O presidente provisional Henrique Rosa deberá sinalar agora as datas para a constitución do novo goberno democrático dun dos países máis pobres da África occidental.
• Máis información sobre os candidatos e o proceso.