Vieiros

Segundo as fontes xurídicas consultadas, non habería ningún problema legal para que se adiase a resolución dos concursos ou que incluso se volvesen convocar. A lei publicada onte no BOE dí que a nova data tope para ter resoltos os concursos é o 31 de decembro e non o 4 de agosto.

En teoría gáñanse cinco meses, pero na práctica as cousas en Galiza seguirán igual. A Xunta indicou que vai seguir adiante co proceso "posto en marcha xa o ano pasado", de tal maneira que o goberno en funcións podería conceder as licenzas de TDT local co Parlamento disolto, inmediatamente despóis das eleccións e xusto antes de que tome posesión o novo executivo.

Para os xornalistas colexiados, a Xunta está cometendo "un abuso de poder" que só se explicaría como unha manobra de "blindaxe mediática do PP de cara ao futuro", segundo manifestou esta mañá o seu Decano, Xosé M. Vega.

O Colexio Profesional de Xornalistas de Galicia xa lle solicitara á Xunta que apartase os concursos da TDT do proceso electoral. Na súa contestación, o departamento de Pérez Varela acusou ao CPXG de "obedecer a intereses partidarios" e dixo que os concursos debían seguir adiante xa que doutro modo caeríase na "deixadez de funcións".

Agora a lei ampara a demanda dos xornalistas e dos partidos da oposición de adiar os concursos.

A falla de sorpresas de última hora, a Xunta tira para adiante con paso decidido e co ánimo de deixalo todo atado e ben atado antes do 18 de xullo, data da constitución do novo Parlamento.