Vieiros

O informe recolle que o estado español dobrou o volume das súas exportacións de armas nos últimos tres anos, acadando a cifra de 321,9 millóns de euros en 2003. A análise dos documentos oficiais revelan, segundo as organizacións que elaboraron o informe, que non existe suficiente transparencia nos datos que achega o goberno.

Así, aseguran que "hai determinados productos que non son considerados armamento por parte das autoridades españolas e, por tanto, quedan fóra dos mecanismos de información e control (como os avións de transporte militar e determinadas armas pequenas e lixieras e as súas municións)". O mesmo acontece coas transferencias que non son exportacións (doazóns, leasing, venda de productos de segunda man ou venda de excendentes). Por esta razón, o informe afirma que o volume real das transferencias de armas españolas é un 50% superior ao declarado polo goberno.

O informe inclúe algúns exemplos que non recollen os datos oficiais:

- A venda de avións de transporte militar a Xordania, Colombia, Polonia, Paraguai Turquía e Francia.

- Vendas de canóns de segunda man a Marrocos polo prezo simbólico de 1€ a unidade.

- A venda de munición para armas lixeiras para numerosos países sub-sahariáns. Destaca a exportación realizada a Sudán, un país en guerra desde 1983 e no que actualmente ocorre a peor crise humanitaria do planeta provocada polo conflicto entre as milicias armadas do Goberno e os grupos rebeldes nas provincias de Darfur. A munición exportada violaba o embargo ao que a UE ten submetido a Sudán desde 1994. Ademais, o ano pasado o estado español exportou munición a Costa de Marfil por valor de 80.000 euros. O conflicto de Costa de Marfil estoupou no outono de 2002.