Vieiros

A Federación de Libreiros de Galicia, co obxecto de potenciar o labor cultural nos distintos eidos, convoca anualmente os premios "Irmandade do Libro" nas modalidades de autor, medios de comunicación, institucións ou entidades, libreiros e colexios.

Estes premios están dotados cunha obra creada ao efecto, sen aportación económica agás no caso dos colexios. Nesta modalidade o gañador levará 250.000 pesetas e os dous finalistas 50.000, cartos que deberán ser investidos en libros.

O autor -única modalidade da que se coñece unha semana antes o gañador- elixido foi Manuel Rivas, pola súa obra O lapis do carpinteiro. Os outros dous finalistas foron Fina Casalderrey e Xosé Neira Vilas.

Na modalidade de medios de comunicación, os "nominados" son: "Guía dos Libros Novos", revista "Grial" e revista "A Trabe de Ouro". En canto a institucións, os tres posibles gañadores son: o Museo do Pobo Galego, o Patronato do Pedrón de Ouro e a biblioteca da Fundación Fermín Penzol.

Os colexios son: I.E.S. Gonzalo Torrente Ballester (Pontevedra), I.E.S.P. de Curtis (A Coruña) e C.E.I.P. de Xuño-Porto do Son (A Coruña). E os libreiros: Librería Bahía (Foz), Viláfer (Cangas do Morrazo) e Casalderrey (Marín).