Vieiros

Os Terribles do Salnés, o grupo de gaiteiros de Vilagarcía, van dar unha boa volta por Portonovo estes días. O día 14, festa da sardiñada espertarán ao persoal, axudados por Os Gatiños e Savia Nova. Unha vez espabilados, haberá que se dirixir a grande sardiñada coa que se celebra a festividade do día.
Será un bo xeito de comezar o San Roque 2000. Unha festa que vai contar con moita música. Do mundo, como o Festival internacional de folclore o primeiro día, pero sobre todo galega. Procesións, pirotecnia, baile e karts completan a oferta festeira de Portonovo.
O día, 15, o da Nosa Señora comezará co ruido das gaitas e das bombas de palenque. Baile rexional e verbena completarán a xornada, que dará paso ao día grande o de San Roque. Roquiño terá misa e procesión na súa honra. Tamén haberá karting e a verbena nocturna, que se converterá en algo ineludible ata o final das festas.
As bandas serán as protagonistas da festa do Carme, o 17, e o 18, festa do can, será o día deportivo, con marathon e piragüismo. Así pois, unha grande verbena popular na honra do Santo Roque, en Portonovo.