Vieiros

Emilio Pérez Touriño mantivo este xoves un encontro con varios centos de mulleres, e aproveitou o ambiente favorable no que estaba para lembrar os logros do seu goberno a nivel de igualdade e criticar a "campaña sucia" do Partido Popular. Eloxiou medidas como o "salario da liberdade", destinado a mulleres maltratadas; ou a discriminación positiva exercida cara ás empresas que deseñan plans de igualdade. Touriño tamén criticou a campaña que está realizando o PP e dixo estar "tranquilo" ante os resultados do 1 de marzo, engadindo que "hai que poñer intranquilos aos do PP, que queren gañar coas furnas baleiras".

Durante o acto, o candidato do PSdeG anunciou que "todas as familias" terán unha praza nunha escola infantil, gracias á creación de 10.000 novas prazas; e anunciou tamén que aqueles que non podan valerse por si mesmos terán dereito a un coidador facilitado pola administración. Durante este encontro expresou a vontade de que as mulleres ocupen a metade dos postos de emprego e, dirixíndose a elas explicouno ao dicir que "sodes o 50%" do país.

Apoio dende Madrid
Emilio Pérez Touriño recibiu hoxe un novo apoio dos seus compañeiros de partido en Madrid e concretamente do vicesecretario de organización do PSOE, José Blanco, que demandou un novo mandato para o PSdeG. Blanco lembrou as accións máis loables do goberno de Touriño e usou como principal argumento para pedir o voto dos galegos o feito de que "o peor que lle podería pasar a Galicia sería ter un goberno que estea inmerso nunha batalla campal contra o Goberno de España".

Remata cunha ruta polas cidades
Touriño aproveitará ao máximo o último día de campaña, que adicará a unha xira por algunhas das cidades galegas. A viaxe estará composta de pequenos actos nas diferentes cidades e comeza na Coruña, ás 10.30 horas, para pasar despois por Lugo, Vigo e Compostela, onde celebrará o acto co que pecha a súa campaña electoral.